أنا ممتعض = أنا أعترض

البعض يعتقدون أنهم مركز الأكوان !

لا أحد مثلهم لا أحد على قدر من علمهم لا أحد على درجه من كمالهم

إذا أردت أن تتعرف عليهم فإليك بعض من صفاتهم الرائعه أعدك عزيزي القارئ أن تنبهر و تصيبك الدهشه !

تمسك بمقعدك جيداً و أستعد للأستكشاف ...................

على طول تلاقيه ممتعض و مش عاجبه حاجه !!

دايما شايف كل الناس علامه إكس false ماشيه على الأرض و هو الوحيد الى ماشى على وشه علامه true 

بيقدس أي حاجه هو بيعملها و يحقر من أعمال الناس لو دخلت بيته هتلاقيه صورته متبروزه فى كل زاويه

و هتلاقيه من النوع الى بيكتب اسمه على اي مكان رجل كرسى ماشى ملايه السرير أوك أزاز العربيه ميضرش

المهم أنه دايماً شخصيه مهوسه بنفسها ...................

من كتر مهو مش شايف غير نفسه و بس بيفقد خالص تذوق الناس تلاقيه مبيتذوقش إلا بيض بالبلوبيف و ده كبيره !

ممكن نشخص حالته على أنه عنده paranoya  ( مرض جنون العظمه ) و فى الحاله دى هو محتاج ملايه بيضا و اتنين تمرجيه و طبعاً عارفين سكته على فين هتبقى دلوقتى !

هو جنون العظمه ده خطير يا دكتور ؟؟ أه زيه  زي جنون البقر بالظبط  تلاقي الشخص يتهبل فى مخه و يفضل يخبط فى اى حد فى وشه فأنصحك تاخدلك جنب كده علشان الشخص ده لما بينطح بيبقى أختراع عظيم جداً

شايلين قلبهم و حاطين علبه ورنيش سوده بس الحقيقه هي علب من النوع الغالي ميزتة الناس دي أن إيدهم فرطه فى الحاجات الى زي كده مش بخلا لا . ما عاش و لا كان الى يقول عليهم كده !

عايش فى فلم البطل و الأوغاد و طول النهار ما بيتعاملش الا مع الاوغاد و هو طبعا البطل هو شايف ان كل الناس اوغاد

دايما تلاقيه بيأمر و ينهي و يقول ده تمام و ده مش تمام تحسه كده عنده داء حريمي كده بس من الغالي ابو المتر ب 55 جنيه ....

نصيحه أخويه أبعد عنه عشان بيجيلو نوبات متقطعه من انفلونزا الخرتيت دى نوع اخر من الانفلونزا تلاقيه على طول فاتح بوقه بالفاظ وقحه فى وش اي حد و كل الناس عنده عباره عن حصالات لازم يمليها شتايم ! و ده طبعا بيشككلنا فى مرض عمي الأشكال الى بيبقى عنده ............................. 

هو فى نظر الناس بيبقى بطيخه قرعه فى سوق العبور و هو فاكر نفسه ديك البرابر لكن الحقيقه المره ابشع من كده بكتير

هو عامل بالظبط زي و لا بلاش عشان الرقابه !!!

و فى النهايه أنا بوجه رساله لكل ممتعض و متعضه أتهدوا بقى خنقتونا !! :D

ياسمين جمال 

3\5\2013